विकास पत्रकारितेचा हरित वारसा – ज्येष्ठ पत्रकार व्ही. एस. कुलकर्णी दादांचा जीवनप्रवास प्रेरणादायी
विकास पत्रकारितेचा हरित वारसा – ज्येष्ठ पत्रकार व्ही. एस. कुलकर्णी दादांचा जीवनप्रवास प्रेरणादायी
उदगीर | प्रतिनिधी
विकासोन्मुख पत्रकारिता म्हणजे काय, याचं जिवंत उदाहरण म्हणजे लोकमतचे ज्येष्ठ पत्रकार व्ही. एस. कुलकर्णी दादा. ४२ वर्षांहून अधिक काळ पत्रकारितेतील कार्य, ५१ हून अधिक राष्ट्रीय आणि राज्यस्तरीय सन्मान, आणि तरीही जमिनीशी नाळ टिकवून ठेवलेली एक निःस्वार्थ वृत्ती — यामुळे ते केवळ पत्रकार नाहीत, तर समाजजीवनातील एक मार्गदर्शक दीपस्तंभ ठरले आहेत.
त्यांनी पत्रकारितेच्या माध्यमातून समाजातील समस्या केवळ अधोरेखित केल्या नाहीत, तर त्या समस्यांवर उपाय सुचवले, प्रशासनाची दिशा बदलली आणि सामान्यांच्या मनात विश्वास निर्माण केला. त्यांची पत्रकारिता म्हणजे विकासाशी जोडलेली पत्रकारिता.
हत्तीबेट – ओसाड माळरानातून हरित क्रांतीपर्यंतची कथा
कुलकर्णी सरांचं सर्वात भव्य स्वप्न म्हणजे हत्तीबेट. कधीकाळी रखरखीत, ओसाड वाटणारा हा परिसर त्यांच्या संकल्पाने हरित बेट बनला. स्वतः झाडं लावली, लोकांना जोडलं, प्रशासनाला सतत विनंती केली आणि शेवटी त्या भूमीला नवा श्वास दिला. आज हत्तीबेट हे पर्यावरणप्रेमींसाठी एक प्रमुख आकर्षण बनले आहे, आणि त्या प्रत्येक झाडाच्या मुळाशी त्यांच्या परिश्रमांची सावली आहे.
फक्त वृक्षलागवड नव्हे, तर समर्थ मंदिराचा विकास, पर्यावरण संवर्धन, सामाजिक एकत्रिकरण यासाठी त्यांनी अथक संघर्ष केला. वाईट शक्तींच्या विरोधात त्यांनी न डगमगता झुंज दिली आणि शेवटी विजय मिळवला. त्यांच्या कार्याचा पाया होता — निष्ठा, संयम, सकारात्मकता आणि अध्यात्मिक श्रद्धा.
पुरस्कारांपेक्षा कार्य अधिक महत्त्वाचे
त्यांच्या नावावर ५१ सन्मान आहेत — पण ते म्हणतात, “पुरस्कार हे कार्यानंतरचं फळ आहे, हेतू नव्हे!” त्यांची ही नम्रता आणि कृतज्ञता हीच त्यांच्या व्यक्तिमत्त्वाची खरी उंची दर्शवते.
त्यांची लेखणी म्हणजे जनतेच्या न्यायासाठी लढणारी तलवार. समाजातील गरीब, वंचित, आणि शोषित यांच्यासाठी त्यांनी आवाज उठवला — त्यांना न्याय मिळवून दिला.
जन्मदिवसाच्या निमित्ताने व्ही. एस. कुलकर्णीदादांना लाख लाख शुभेच्छा!
आपल्या लेखणीची सावली ही आज हजारो झाडांच्या सावलीसारखी झाली आहे.
आपले कार्य हे पत्रकारिता क्षेत्रातील सच्चा आदर्श आहे.
वैजनाथ धोंडोपंत काप्रतवार
संपादक, एकमुख
