उदगीर पंचायत समिती–जिल्हा परिषद निवडणुकीस मतदानाला सुरुवात
पहिल्या दोन तासांत 5.49 टक्के मतदान
उदगीर प्रतिनिधी — जिल्हा परिषद व पंचायत समिती सार्वत्रिक निवडणूक 2026 अंतर्गत उदगीर पंचायत समिती मतदारसंघात आज शनिवार, 7 फेब्रुवारी रोजी सकाळी 7.30 वाजल्यापासून मतदान प्रक्रियेला सुरुवात झाली. मा. राज्य निवडणूक आयोगाच्या आदेशानुसार सर्व मतदान केंद्रांवर शांततेत व नियोजनबद्ध पद्धतीने मतदान सुरू आहे.
निवडणूक निर्णय अधिकारी कार्यालयाकडून प्राप्त झालेल्या प्राथमिक माहितीनुसार सकाळी 7.30 ते 9.30 या पहिल्या दोन तासांत एकूण 5.49 टक्के मतदान झाले आहे. या कालावधीत एकूण 9 हजार 461 मतदारांनी आपला मतदानाचा हक्क बजावला.
उदगीर पंचायत समिती क्षेत्रात एकूण 89 हजार 455 मतदार नोंदणीकृत असून त्यामध्ये पुरुष व महिला मतदारांचा समावेश आहे. सकाळच्या सत्रात मतदान केंद्रांवर मतदारांची संथ पण सातत्यपूर्ण उपस्थिती दिसून आली. काही ठिकाणी सुरुवातीला गर्दी कमी असली तरी पुढील वेळेत मतदानाचा टक्का वाढेल, असा अंदाज प्रशासनाकडून व्यक्त करण्यात येत आहे.
सर्व मतदान केंद्रांवर पोलिस बंदोबस्त ठेवण्यात आला असून मतदान प्रक्रिया पारदर्शक व शांततेत पार पडावी यासाठी प्रशासन सज्ज आहे. प्रत्येक दोन तासांनी मतदानाचा सविस्तर अहवाल जिल्हाधिकारी कार्यालयाकडे सादर करण्यात येत असल्याची माहिती निवडणूक निर्णय अधिकारी सुशांत शिंदे यांनी दिली.
दरम्यान, नागरिकांनी निर्भयपणे आणि उत्स्फूर्तपणे मतदानात सहभागी व्हावे, असे आवाहन प्रशासनाकडून करण्यात आले आहे.
