वाशीममध्ये येणार ‘सुवर्ण’ युग
…………..

वाशीम मतदारसंघातील राजकीय समीकरण : सुवर्णा सागर कोकास यांची मुसंडी
…………………..

वाशीम (प्रतिनिधी) : वाशीम विधानसभा मतदारसंघ यंदा नवा इतिहास रचू शकतो. गेल्या काही निवडणुकांपासून हा मतदारसंघ भाजपचा बालेकिल्ला राहिला आहे, मात्र या वेळच्या निवडणुकीत भाजपचे आव्हान कमकुवत झाल्याचे दिसत आहे. कारण म्हणजे भाजपने विद्यमान आमदार लखन मलिक यांचे तिकीट कापून नवीन चेहरा निवडला आहे. त्यामुळे स्थानिक पातळीवर भाजप कार्यकर्त्यांमध्ये अस्वस्थता निर्माण झाली आहे. याचा फायदा बहुजन समाज पक्षाच्या उमेदवार सुवर्णा सागर कोकास यांना मिळण्याची शक्यता वर्तवली जात आहे.
शिवसेनेने आतापर्यंत भाजपला या मतदारसंघात कायम साथ दिली आहे. मात्र, आता शिवसेनेत झालेल्या फुटीनंतर हिंदुत्ववादी मतांमध्ये देखील फूट पडली आहे. एकीकडे शिवसेना शिंदे गटात सामील झालेल्यांचे मते भाजपच्या पारड्यात जातील, अशी अपेक्षा आहे, तर दुसरीकडे उद्धव ठाकरे गटाचा उमेदवार मैदानात आहे.
या फुटीनंतर हिंदुत्ववादी मतदारांमध्ये एकजूट राहणे अवघड झाले आहे, ज्याचा अप्रत्यक्ष फायदा कोकास यांना होऊ शकतो.

वाशीम विधानसभा मतदारसंघात या वर्षी पारंपरिक पक्षांना एका नव्या शक्तीचे आव्हान मिळणार आहे. सुवर्णा सागर कोकास यांच्या नेतृत्वाखालील बहुजन समाज पक्षाची स्थिती प्रबळ वाटत असून, भाजपला असलेले आव्हान कमी करण्यासाठी स्थानिक नेत्यांना कसरत करावी लागेल.

पोटजातीचे समीकरण

वाशीम मतदारसंघ अनुसूचित जातीसाठी राखीव आहे. नवबौद्ध समाजाची येथे मोठी संख्या आहे. नवबौद्धांमध्येही विविध पोटजाती आहेत, ज्यात सुवर्णाताईंच्या पोट जातीची म्हणजे सोमस समाजाची मते मोठ्या प्रमाणावर आहेत. वाशीम आणि मंगरूळपीर तालुक्यांमध्ये या समाजाचे सुमारे ४० ते ४२ हजार मतदार आहेत. त्यामुळे या मतदारसंघात सुवर्णा कोकास यांना त्यांच्या समाजाकडून भक्कम पाठिंबा मिळण्याची शक्यता आहे.

आंतरजातीय विवाहामुळे वाढलेला आधार

सुवर्णा कोकास यांनी आंतरजातीय विवाह केला असून, त्यांचे पती सागर कोकास हे ओबीसी समाजातून आहेत. यामुळे, कोकास यांच्या उमेदवारीसाठी अनुसूचित जातीसोबतच ओबीसी समाजाचाही पाठिंबा मिळू शकतो. सागर कोकास हे विद्यार्थी दशेपासून सामाजिक कार्यात सक्रिय असून, त्यांचा ओबीसी आणि खुल्या प्रवर्गातील जनतेत चांगला जनसंपर्क आहे. मदतीसाठी सदैव तत्पर राहणाऱ्या सागर कोकास यांची प्रतिमा या निवडणुकीत महत्त्वाची भूमिका बजावू शकते.

वाशीम मतदारसंघातील संभाव्य राजकीय परिणाम

वाशीम मतदारसंघात सुवर्णा सागर कोकास यांची उपस्थिती आणि त्यांचे सामाजिक समीकरण पाहता, त्यांनी आपल्या प्रतिस्पर्धींना कठोर आव्हान दिले आहे. एकीकडे भाजपमधील तिकीट वाटपातील नाराजी, शिवसेना फूट, आणि हिंदुत्ववादी मतांचे विभाजन, तर दुसरीकडे सुवर्णाताईंचे आंतरजातीय समीकरण व त्यांच्या पोटजातीतील मोठा मतदार वर्ग ही गणिते त्यांना विजयाच्या उंबरठ्यावर नेऊ शकतात.
सुवर्णाताईंची बहुजन समाज पक्षातून होणारी उमेदवारी ही बहुजन आणि अनुसूचित जातीच्या मतदारांसाठी एक आश्वासक पर्याय ठरली आहे. त्यांचा सामाजिक आणि पोटजातीय आधार, तसेच त्यांचे ओबीसी समाजातील संपर्क आणि सहानुभूती यामुळे निवडणुकीत एकतर्फी वातावरण निर्माण होत आहे. यामुळे या निवडणुकीत सुवर्णा सागर कोकास या विजयाच्या शर्यतीत अग्रेसर ठरू शकतात.